Унікальнасць беларускага Дня Незалежнасці, даты, якія самым дэмакратычным у свеце спосабам, на рэферэндуме, выбралі беларусы - у яе сімвалічнасці. 3 ліпеня адсылае нас не да распаду Савецкага Саюза і фармальнай незалежнасці, а да моманту нашага найвялікшага трыўмфу - вызваленню роднай зямлі. У гэтым подзвігу ўдзельнічалі ўсе народы вялікай краіны, і таму наш Дзень Незалежнасці і наша галоўнае дзяржаўнае свята збліжае і дзяржавы, і народы, - усіх нашчадкаў пакаленняў пераможцаў.
Вайна прайшла праз кожную сям'ю, 22 чэрвеня і сёння - самая жалобная дата ў календары. Але 3 ліпеня краіна нібы зноў перажывае веліч моманту вызвалення. Кожны дзень вайны, мужнасць вызваліцеляў і стойкасць народа - частка нашай самасвядомасці, якая перадаецца з пакалення ў пакаленне.
У гэты ўрачысты дзень, дзень Незалежнасці Рэспублікі Беларусь, дзень вызвалення Беларусі ад нямецка-фашысцкіх захопнікаў ля помніка воінам-вызваліцелям у парку г. Іўе сабраліся прадстаўнікі раённай улады, лідары і члены грамадскіх аб’яднанняў, працоўных калектываў, моладзь і ветэраны працы, каб аддаць даніну глыбокай павагі гераічнасці франтавікоў і працаўнікоў тылу, якія сваім патрыятызмам і верай у Перамогу адстаялі свабоду, практычна зноў адбудавалі і аднавілі краіну пасля ваеннага ліхалецця.
Гэты памятны дзень - нагода для нас успомніць аб тых вялікіх стратах, якія панёс народ Беларусі ў час вайны. Толькі на тэрыторыі нашага раёна склалі галовы у Вялікай Айчыннай за светлую будучыню больш за пяць тысяч чалавек.
-3 ліпеня - адна з найважнейшых дат у календары беларускай нацыянальнай памяці разам з трагічным 22 чэрвеня і гераічным 9 мая, – сказаў старшыня райвыканкама Ігар Генец. – І калі 22 чэрвеня мы схіляем галовы ў памяць аб ахвярах той страшнай вайны, а 9 мая мы радуемся Вялікай Перамозе ўсяго свету над фашызмам, то Дзень Незалежнасці Рэспублікі Беларусь - нагода асэнсаваць трагедыю і гераізм усяго беларускага народа.
Мы, нашчадкі пераможцаў, у гэты святочны дзень выказваем вялікую ўдзячнасць пакаленням, якія бачылі кровапралітную вайну, вызвалілі краіну ад гітлераўскіх захопнікаў, перамаглі генацыд і ў пасляваенны час аднавілі рэспубліку. Іх подзвіг – гэта духоўны фундамент, які сёння дапамагае нам дастойна пераадольваць цяжкасці і ўпэўнена ісці да пастаўленых мэт.
Затым адбылося ўскладанне кветак да памятнага знака «У гонар загінуўшых землякоў у гады Вялікай Айчыннай вайны» і помніка землякам, якія загінулі ў Афганістане. Памяць аб гераічных продках ўшанавалі хвілінай маўчання.
Мерапрыемствы ў гонар Дня Незалежнасці прадоўжыліся на святочнай пляцоўцы набярэжнай г. Іўе.
І. Бутурля. Фота С. Зянкевіча.