Чараўніцтва - гэта менавіта тое, што чакае кожнае дзіця ў Новы год. І калі па нейкай прычыне яго не адбываецца, на дапамогу Дзеду Марозу і Снягурцы прыходзіць традыцыйная дабрачынная акцыя "Нашы дзеці".
Дарэчы, яна праходзіць пад патранатам Прэзідэнта ўжо ў 26-ы раз. У гэтым годзе яна пачнецца 14 снежня 2021 года і прадоўжыцца ажно да 14 студзеня 2022 года. Цэлы месяц, напоўнены казачнымі цудамі, выкананнем жаданняў і мараў, цяплом і дабрынёй, чакае хлопчыкаў і дзяўчынак з дзіцячага дома сямейнага тыпу, дзяцей з апякунскіх і прыёмных сямей, дзяцей-інвалідаў і іншых.
Да іх у госці завітаюць прадстаўнікі выканаўчых і распарадчых органаў, розных службаў і ведамстваў, каб павіншаваць з Новым годам і Калядамі, пасадзейнічаць ў вырашэнні існуючых праблем.
30 снежня з удзелам кіраўніцтва раёна пройдзе навагодняе дабрачыннае свята. Сюда запросяць дзяцей ва ўзросце 8-14 гадоў з ліку: дзяцей-сірот, дзяцей, якія засталіся без бацькоўскай апекі; дзяцей-інвалідаў; дзяцей са шматдзетных і малазабяспечаных сямей, сямей, у якіх дзеці знаходзяцца ў сацыяльна небяспечным становішчы; навучэнцаў, якія ўзнагароджаны па выніках раённых, абласных і рэспубліканскіх алімпіядаў, творчых конкурсаў і спартыўных спаборніцтваў; навучэнцаў, якія маюць поспехі ў грамадскай рабоце.
Плануецца, што да ўдзелу ў дабрачыннай акцыі "Нашы дзеці" далучацца сельскія выканаўчыя камітэты, установы, арганізацыі і прадпрыемствы раёна. Падарыць дзецям радасць, выканаць запаветнае жаданне - што можа быць лепш? Напэўна, таму ўдзельнікаў акцыі з кожным годам усё больш.
Ірына БУТУРЛЯ.