Працэсія Божага Цела ў многіх католікаў асацыюецца з прыгожымі алтарамі, дзяўчынкамі, якія пасыпаюць кветкі, міністрантамі, маладымі бярозкамі і радасным спевам рэлігійных гімнаў і песень. Такая праява веры, якой з’яўляецца працэсія, нясе ў сабе столькі традыцый, наколькі хапае фантазіі і энтузіязму вернікам.
Адной з незвычайных для Беларусі традыцый, якая не першы год практыкуецца ў іўеўскай парафіі, з’яўляецца ўпрыгожванне кожнага прыгатаванага алтара да працэсіі дыванамі з жывых кветак. Такім чынам, пялёсткі кветак, сабраныя ў прыгожыя яскравыя дываны, з’яўляюцца данінай, якую жыхары горада прысвячаюць Найсвяцэйшаму Сакрамэнту.
Падрыхтоўка такой прыгажосці патрабуе асаблівай адказнасці, сіл і звычайнай людской фантазіі. Для таго каб злажыць дываны, выкарыстоўваюць высількі, бэз, ружы, рамонкі, а таксама лісце папараці, мох, кару альбо звычайную скошаную траву. Матэрыял і ўзоры залежаць ад крэатыўнасці стваральнікаў і наяўнасці раслін. У асноўным гэта тая зеляніна, якую вернікі парафіі вырошчваюць на сваіх падворках. Характэрна і тое, што ў шматканфесіянальным добразычлівым Іўі нярэдка людзі іншых веравызнанняў дапамагаюць кветкамі з сваіх садоў і кветнікаў.
Стваральнікамі дываноў часта з’яўляюцца малітоўныя групы, супрацоўнікі арганізацый горада альбо жыхары вуліц. З імі часцей за ўсё знаходзіцца духоўная асоба.
Увогуле працэс стварэння пачынаецца загаддзя. Напачатку тыдня людзі збіраюцца, каб абмеркаваць дызайн алтароў і дываноў, падзяліцца думкамі на гэты конт. Затым наступае працэс пошуку матэрыялу для творчасці. У суботу збіраецца каркас алтароў і падрыхтоўваецца зеляніна для дываноў, а раніцай нядзелі ўся гэта прыгажосць з’яўляецца на цэнтральнай плошчы горада.
Імша з нагоды працэсіі Божага Цела распачынаецца ў святыні а 10-й гадзіне. Такім чынам, кветкавыя дываны і алтары павінны быць зроблены паміж 6-9-й гадзінамі. Таксама, каб маляўнічая праца вернікаў не загінула ў спякотны дзень, да самой працэсіі зеляніну паліваюць вадою.
Як і штогод, працэсія вырушыла ад парафіяльнай святыні да цэнтральнай плошчы горада.
Адзін з прыпынкаў Эўхарыстычнай працэсіі адбыўся каля помніка ў гонар адзінства і сяброўства канфесій Іўеўшчыны, які ў сёлетную ўрачыстасць Найсвяцейшага Цела і Крыві Хрыста адзначыў 10-ую гадавіну свайго існавання.
На дыване перад гэтым алтаром, які з’яўляецца самым вялікім па памерах, былі вылажаны словы “БОЖА, БАРАНІ НАС АД ГОЛАДУ І ВАЙНЫ”. Гэты алтар рыхтавалі сем’і, з якіх дзеці ў гэтым годзе прынялі першую Святую Камунію.
Алтар, які рыхтаваў “Легіён Марыі” і настаўнікі, упрыгожваў дыван з кветкавым ружанцам. На іншых дыванах былі бачны келіх з вінаградам, сэрца, крыж, сонца і розныя ўзоры.
Завяршылася працэсія ўрачыстым благаслаўленнем каля касцёла св. апосталаў Пятра і Паўла.
Раман Ярмош.
Фота Станіслава Зянкевіча.