Сваю прыналежнасць да роднай краіны
Засведчыць нам кніжка, якую заўжды
Ля сэрца свайго берагчы мы павінны
Праносячы годна з сабой праз гады.
15 сакавіка наша краіна адзначае дзяржаўнае свята – Дзень Канстытуцыі Рэспублікі Беларусь. Гэта закон, які валодае найвышэйшай юрыдычнай сілай. Усе іншыя законы і правілы, якія дзейнічаюць у нашай краіне, не павінны яму супярэчыць. Менавіта Канстытуцыя вызначае дзяржаўны і грамадскі лад Беларусі, прававы статус чалавека.
У Лелюкінскай сярэдняй школе стала добрай традыцыяй у гэты дзень праводзіць мерапрыемствы, на якіх ідзе размова аб дзяржаве, яе законах, правах і абавязках грамадзяніна, сімволіцы.
Вось і сёння ў актавай зале школы для вучняў 5 – 11-х класаў прайшло свята “Ганаруся сваёй краінай!”, у якім прынялі ўдзел ганаровыя госці – І сакратар РК ГА “БРСМ” Вераніка Андрэеўна Кучынская і старшыня РС ГА “БРПА” Марыя Францаўна Гут.
З дапамогаю вядучых і самадзейных артыстаў навучэнцы здзейснілі віртуальную экскурсію па знакамітых і памятных мясцінах Беларусі, невялікі экскурс у гісторыю стварэння Канстытуцыі, прайшліся па самых галоўных пунктах, якія вызначаюць паняцце “быць грамадзянінам”, “быць патрыётам сваёй краіны”.
І вось надыйшоў самы хвалюючы момант – уручэнне галоўнага дакумента грамадзяніна Рэспублікі Беларусь і падарункавага выдання “Я – грамадзянін Рэспублікі Беларусь…
Пачэсная місія ўручэння пашпарта грамадзяніна Рэспублікі Беларусь выпала І сакратару РК ГА “БРСМ” Кучынскай В.А. Вераніка Андрэеўна ў сваім віншавальным звароце да юнакоў адзначыла, што галоўная задача кожнага з іх сёння – быць сапраўдным грамадзянінам, абаронцам, патрыётам сваёй краіны, зберагчы тую гістарычную спадчыну, якая стагоддзямі назапашвалася і прымнажалася продкамі.
Падарачнае выданне “Я – грамадзянін Рэспублікі Беларусь” уручыла рабятам старшыня РК ГА “БРПА” Гут М.Ф. Марыя Францаўна заўважыла, што атрыманне пашпарта грамадзяніна Рэспублікі Беларусь і падарачнага выдання з’яўляецца знакавай падзеяй у жыцці кожнага жыхара нашай краіны, таму што не толькі дае вялікія правы, але і адначасова ўскладае пэўныя абавязкі. Урачыстая ж абстаноўка, арганізаваная з нагоды гэтай знакавай падзеі, дае магчымасць юнакам і дзяўчатам адчуць канстытуцыйна-прававую сувязь з краінай, убачыць, якая асаблівая ўвага на дзяржаўным узроўні надаецца моладзі. Яна выразіла надзею, што цяперашняе маладое пакаленне ў найбліжэйшай будучыні будзе з высокім пачуццём грамадзянскасці і патрыятызму ўносіць дастойны ўклад у развіццё сваёй краіны.
З уручэннем пашпартоў і падарачных выданняў павіншавала маладых людзей дырэктар школы Галіна Іосіфаўна Алешчык. Яна пажадала ўсім мірнага неба над галавой, здароўя, дасягнення пастаўленых мэтаў, поспехаў ва ўсіх пачынаннях на карысць сваёй сям’і, школы і Беларусі.
Ад імя юных грамадзян краіны выступілі навучэнцы 9 класа. Яны прамовілі словы клятвы на вернасць сваёй Радзіме: “Мы добра разумеем, у які напружаны і цяжкі перыяд у гісторыі Рэспублікі Беларусь мы становімся яе грамадзянамі. Мы добра разумеем, што ад нашага пакалення залежыць будучыня краіны. Прымаючы на сябе ганаровае званне грамадзян Беларусі, мы клянемся сваёй вучобай, сваёй працай і сваімі справамі ўмацоўваць аўтарытэт і добрае імя. Мы клянемся быць годнымі памяці дзядоў і прадзедаў, якія аддалі свае жыцці за гонар і незалежнасць нашай Радзімы. Мы клянемся ўсе свае веды, усю сваю працу і ўсе свае сілы аддаць на тое, каб стаць сапраўднымі гаспадарамі зямлі беларускай і ўсяляк спрыяць росквіту Рэспублікі Беларусь.”
Завяршылася мерапрыемства акцыей “Спяваем гімн разам” і калектыўным фатаграфаваннем.
Хотите читать актуальные новости Ивья и Ивьевского района первыми? Подписывайтесь на наш Телеграм-канал по ссылке https://t.me/ivyenews
Аляксандра Лапата,
педагог-арганізатар
Лелюкінскай сярэдняй школы
Іўеўскага раёна