У адным з гістарычных даследаванняў ёсць звесткі аб тым, што ў 1458 годзе ў Геранёнах Мураваных пабудаваны касцёл імя Святога Яна Хрысціцеля. Ён знаходзіўся ў паўночна-заходняй часці мясцовасці, каля 1 км ад фальварку. Гаштольдаў касцёл імя Святога Мікалая з'явіўся ў Геранёнах у 1519 годзе.
У 30-х гадах мінулага стагоддзя мясцовы памешчык Шымон Мэйштовіч заказаў у Вільні памятны бронзавы крыж і паставіў на месцы былога касцёла імя Святога Яна Хрысціцеля. (Касцёл пачалі разбураць у час руска-польскай вайны 1654-1667, і асабліва - ў час баёў 1795 года (трэці падзел Рэчы Паспалітай), калі былі разбітыя мураваныя дамы, ратуша).
Крыж - чатырохканцовы. Тут мы бачым прыгожыя завіткі, як бы кветачкі. З цэнтра крыжа выходзяць тонкія пруткі, утвараючы своеасаблівыя прамяні. На фоне неба такая кампазіцыя выглядае вельмі маляўніча.
Гэты невялічкі допіс адказвае на пытанне гасцей, экскурсантаў, праезжага люду, - чаму ў полі пастаўлены гэты прыгожы крыж.
Калі я гляджу на гэтую цудоўную мастацкую коўку, мне ўспамінаецца ўрывак з верша нашага земляка Яўгена Карпуця:
Душой сваёй заўжды малюся
За лёс любімай Беларусі,
І за народ у гэтым краі.
Хай Бог яго благаслаўляе.
А. СМАЛЯНІЧЭНКА,
аг. Геранёны.