Беларуская вусна-паэтычная творчасць - важная частка духоўнай культуры нашага народа. Здаўна служыць яна магутным сродкам вобразнага пазнання жыцця, праўдзіва адлюстроўвае думкі, ім-кненні і спадзяванні народных мас, садзейнічае выхаванню іх эстэтычных густаў і ідэалаў. На працягу многіх стагоддзяў вусна-паэтычная творчасць была амаль адзінай формай выражэння духоўнага жыцця людзей: яна з'яўлялася і з'яўляецца неад'емнай часткай культурнай спадчыны народа, яна спадарожнічае чалавеку на працягу ўсяго яго жыцця.
Народна-паэтычная творчасць і сёння адыгрывае важную ролю ў духоўным жыцці людзей, у фарміраванні іх эстэтычна-мастацкіх густаў, ідэалаў і светапогляду.
Яшчэ задоўга да таго, калі мастацкае слова было зафіксавана ў помніках пісьменнасці, народ выяўляў свае настроі і думы ў песнях, казках, легендах і паданнях, якія былі першымі праявамі яго мастацкай творчасці. Яны на працягу многіх гадоў і стагоддзяў свайго бытавання перадаваліся, станавіліся выдатнымі творамі мастацтва. У іх адлюстроўваліся ўсе найважнейшыя асаблі-васці народнага жыцця з самых далёкіх часоў.
Фальклор - гэта няспынная творчасць народа. Таму так важна захаваць гэты дзіўны пласт нашай культуры, перадаць яго нашчадкам, карыстацца ім, як найвялікшым сродкам, які выхоўвае нацыю.
Менавіта такія мэты ставіць перад сабой і традыцыйны абласны фестываль рэгіянальнага фальклору "Панямоння жыватворныя крыніцы", які днямі адбыўся ў нашым горадзе.
Іўе - зямля сяброў, як трапна адзначыў паэт. Таму мы заўжды рады вітаць іх у сябе, таму неаднаразова шматлікія фестывалі абіраюць старадаўняе мястэчка, а зараз - сучасны горад - месцам свайго правядзення.
Надвор'е крыху падкарэктавала правядзенне свята фальклору. Яно павінна было адбыцца на іўеўскай набярэжнай. Аднак, і тыя, хто спяваў, танцаваў, і тыя, хто прывез свае творы з саломкі, дрэва, бісеру і розную іншыю прыгажосць, павінны былі абысціся памяшканнем Іўеўскага цэнтра культуры і вольнага часу. Ды нішто! Усе атрымалася прыгожа і цудоўна. Інакш і не можа быць.
Таму што захаванне, развіццё і прапаганда традыцыйнай народнай творчасці Панямоння, далучэнне да гісторыка-культурнай спадчыны дзяцей, падлеткаў, моладзі садзейнічае выяўленню самабытных носьбітаў фальклору, папулярызацыі іх творчасці, пашырэнню межаў іх дзейнасці.
І вось лепшыя аўтэнтычныя гурты і фальклорныя калектывы Іўеўскага, Воранаўскага і Лідскага раёна з'ехаліся на занальны абласны фестываль.
Было шмат цікавых калектываў, якія бы вярнулі гледачоў і журы ў сівую даўніну.
Луналі мелодыі, гучалі песні, спявалі валачобнікі, адбівалі абцасы ў танцы Лявон з Лявоніхай…
Патрэбна адзначыць, што вельмі ўдала быў прадстаўлены наш раён. Гэта народны ансамбль народнай музыкі "Чабарок", фальклорны ансамбль "Вечарніца" Іўеўскага цэнтра культуры і вольнага часу, фальклорныя гурты аддзелаў культурна-масавай і асветніцкай работы в. Бакшты, аг. Суботнікі, дзіцячы фальклорны гурт "Жавароначкі" аг. Лаздуны1, ансамбль народнай песні "Юрацішкаўскі кірмаш".
Лепшыя з удзельнікаў будуць мець гонар прадстаўляць свае раёны на заключным канцэрце фестывалю "Панямоння жыватворныя крыніцы".
В. ГУЛІДАВА.
Фота С. ЗЯНКЕВІЧА.
