ДУК "Іўеўская раённая бібліятэка" прыняла ўдзел у абласным конкурсе "На лепшую самаробную кнігу". Конкурс праводзіўся ў рамках культурных мерапрыемстваў да Дня беларускага пісьменства ў г. Шчучыне. Мэтамі конкурса з'яўляліся: папулярызацыя кнігі і чытання праз творчасць і фантазію, развіццё і падтрымка навыкаў асоб, якія захапляюцца літаратурна-мастацкай творчасцю і выяўленчым мастацтвам, стымуляванне і стварэнне ўмоў для рэалізацыі творчай актыўнасці сярод насельніцтва Гродзен
Конкурс праводзіўся ў намінацыях: "На лепшае мастацкае афармленне ўласнага твора", "На лепшае мастацкае афармленне (твора ці яго ўрыўка) беларускага аўтара", "На лепшае мастацкае афармленне (твора ці яго ўрыўка) з калекцыі рэдкіх выданняў". Крытэрыямі ацэнкі творчых работ былі - арыгінальнасць ідэі, граматнасць, дакладнасць зместу кнігі, наяўнасць ілюстрацый, разнастайнасць тэхнікі выканання і выкарыстаных для афармлення матэрыялаў. Усе конкурсныя работы выконваліся на беларускай мове, з прымяненнем любых матэрыялаў і любой тэхнікі, за выключэннем камп'ютарных тэхналогій.
Ад бібліятэк раёна былі прадстаўлены тры кнігі: "Слуцкія ткачыхі" Максіма Багдановіча (бібліятэка-філіял аг.Суботнікі), "Жыціе блажэннай Еўфрасінні, Ігуменні манастыра Уседзяржыцеля Святога Спаса ў горадзе Полацку" (Іўеўская раённая бібліятэка), "След на зямлі" Яўгена Карпуця (бібліятэка-філіял г.п.Юрацішкі).
Па выніках конкурсу нашы бібліятэкі сталі пераможцамі ў двух намінацыях і атрымалі ўзнагароды на святкаванні Дня беларускага пісьменства ў г. Шчучыне. Дыпломам І ступені ўзнагароджаны творчы калектыў Іўеўскай раённай бібліятэкі (кіраўнік Святлана Абрыеўна Мірончык) за перамогу ў абласным конкурсе "На лепшую самаробную кнігу" ў намінацыі "На лепшае мастацкае афармленне твора (ці яго ўрыўка) з калекцыі рэдкіх выданняў". Дыплом ІІ ступені атрымала Святлана Мікалаеўна Іванова, загадчык бібліятэкі-філіяла аг.Суботнікі, за перамогу ў намінацыі "На лепшае мастацкае афармленне твора (ці яго ўрыўка) беларускага аўтара".
Фотаздымкі лепшых работ размешчаны на сайце ДУК "Гродзенская абласная навуковая бібліятэка імя Я.Ф. Карскага".
Віншуем з перамогай!
П. УЛАДЗІН.
