На працягу 2016 года ва ўсіх публічных бібліятэках вобласці будзе праходзіць акцыя “Чытаем разам”. Мэта абласной акцыі – прыцягненне грамадства да чытання беларускай літаратуры. Да чытання запрашаюцца прадстаўнікі мясцовых улад, кіраўнікі прадпрыемстваў і ўстаноў, творчая інтэлігенцыя.
Першыя мерапрыемствы у межах абласной акцыі “Чытаем разам” прысвячаюцца творчасці юбіляра 2016 года, беларускага пісьменніка, паэта, сатырыка, драматурга, перакладчыка і літаратуразнаўца - Кандрата Крапівы.
У Гродне чытанні адбудуцца 13 красавіка 2016 года ў 12.30 гадзін - на базе дзіцячага філіяла абласной бібліятэкі (вул.Савецкая, 25) і ў 15.30 гадзін – у галоўным корпусе абласной бібліятэкі імя Я.Ф.Карскага (вул. Замкавая, 20). Праграмай прадугледжана чытанне твораў, мультымедыйная прэзентацыя, выставы літаратуры: “Майстар пякучага слова”, “Чытаючы Кандрата Крапіву”, “Чытаем Кандрата Крапіву”, “Я – пякучка-крапіва”.
Арганізавана абласное мерапрыемства сумесна галоўным упраўленнем ідэалагічнай работы, культуры і па справах моладзі Гродзенскага аблвыканкама, ДУК “Гродзенская абласная навуковая бібліятэка імя Я.Ф.Карскага” і бібліятэка УА “Гродзенскі дзяржаўны ўніверсітэт імя Янкі Купалы”. У акцыі прымуць удзел першы намеснік начальніка галоўнага ўпраўлення ідэалагічнай работы, культуры і па справах моладзі Гродзенскага аблвыканкама Аляксандр Людвігавіч Вярсоцкі, пракурор Гродзенскай вобласці Віктар Мікалаевіч Марозаў, галоўны рэдактар абласной газеты “Гродзенская праўда” Павел Якаўлевіч Сухарукаў.
У гэты ж дзень аналагічныя чытанні з удзелам знакамітых людзей рэгіёнаў будуць праводзіцца ў іншых публічных бібліятэках вобласці.