19 жніўня 2017 года ў д.Бакшты праведзены фестываль вясковай культуры «Бакштаўскі каларыт». Дакрануцца да сваіх вытокаў, далучыцца да святочных і штодзённых традыцый дзядоў і прадзедаў запрасіў творчы калектыў аддзела культурна-масавай і асветніцкай работы д.Бакшты.
Адкрыў фестываль старшыня Бакштаўскага сельвыканкама Буляк Аляксандр Уладзіміравіч, які выказаў заклапочанасць у зберажэнні традыцыйнай вясковай культуры, заклікаў аднавяскоўцаў падтрымліваць не толькі народную культуру, але і культуру быта, прысядзібнай тэрыторыі, рабіць усё магчымае для росквіту роднага краю.
Разам з вандроўнікам, жартаўніком Несцеркам і бакштаўскімі гаспадынямі Адэляй і Акулінай гледачы з вялікім задавальненнем паслухалі аповед паважанай спадарыні Семянягі Ніны Андрэеўны аб традыцыях, звычаях вёскі Бакшты, частаваліся спасаўскімі духмянымі яблыкамі, вясковымі прысмакамі, танцавалі народныя танцы.
На мерапрыемстве гучалі народныя песні ў выкананні калектываў аматарскай творчасці аддзела і сектара культурна-масавай і асветніцкай работы в.Бакшты, аг.Дайліды дзяржаўнай установы культуры “Іўеўскі цэнтр культуры і вольнага часу” і фальклорнага калектыву аг.Сакаўшчына Валожынскага раёна Мінскай вобласці. Дзеці актыўна ўдзельнічалі ў гульнёва-забаўляльнай праграме «Гульнёвы кірмаш».
На працягу фестывалю працавалі: выстава-кірмаш народнай творчасці «З крыніц прыгажосці», выстава прадметаў народнага побыту “Зроблена рукамі землякоў”, майстар-класы па традыцыйных відах рамёстваў, бяспройгрышная латарэя, гандлёвыя палаткі, атракцыёны.
