Не можа не радаваць, што дзень 17 верасня вярнуўся ў наш айчынны каляндар не толькі як напамін аб каштоўнасці свабоды і незалежнасці, але і як даніна эпосе, якая падарыла нам, беларусам, права заняць сваё месца на карце свету. А месца мы занялі дастойнае і пачэснае, стаўшы адной з самых міралюбівых краін на планеце Зямля.
Добра, што Дзень народнага адзінства мы ўжо пачалі актыўна святкаваць. У рэспубліцы арганізоўваюцца выставы, праходзяць мерапрыемствы, навучэнцкая моладзь піша творчыя працы, даследаванні і рэфераты. Ужо разгарнулася акцыя “Беларусь адзіная”, якая стартавала з Маладзечна. І гэта не проста аўтапрабег аднадумцаў, якія надзвычай любяць сінявокую Беларусь. Гэта найперш яшчэ адна, чарговая кансалідацыя патрыятычных сіл, прапаганда дасягненняў дзяржавы. Гэта свайго кшталту чарговы грамадска-палітычны форум. Гэта шматлікія дыскусійныя пляцоўкі, што разгарнуцца напярэдадні свята. Арганізоўваць многае будуць надзейныя лідары з грамадскіх аб’яднанняў: “Белай Русі”, Федэрацыі прафсаюзаў, ветэранскіх і моладзевых арганізацый, Беларускага саюза жанчын.
А з Маладзечна шлях “Беларусі адзінай” пойдзе ў Бярозу, затым у Светлагорск, потым у Оршу, Ліду. Напрыканцы – пункты незабыўных сустрэч – Магілёў і сталіца Бацькаўшчыны.
Вельмі важна, што акцыя “Беларусь адзіная” ахопіць да 17 верасня ўсе рэгіёны краіны. Дададзім, што гэтая акцыя ў нас ужо стала традыцыйнай, праводзіцца з 2021 года.
Дзень народнага адзінства, бясспрэчна, знакавае і сімвалічнае для нас свята - як і Дзень Перамогі, і Дзень Незалежнасці. Усе гэтыя святы накіраваны на захаванне гістарычнай памяці.
Прыемна, што мой народ шануе сваю гісторыю, мы ганарымся кожнай яе старонкай. Многае мы ўпісваем самі – сваёй добрай вучобай, працай. Многа герояў загінула ў Вялікую Айчынную, абараняючы наш суверэнітэт. І новыя пакаленні прымаюць эстафету абаронцаў міру і незалежнасці. Шматлікія ваенна-патрыятычныя клубы, арганізацыі пашыраюць рады патрыётаў, там наша моладзь духоўна расце. Вялікую працу праводзяць і клубы ваенна-гістарычнай рэканструкцыі. Юныя беларусы наведваюць гераічныя, мемарыяльныя мясціны, знаёмяцца з біяграфіяй герояў Бацькаўшчыны.
Многія з нас зноў і зноў вяртаюцца да вывучэння нацыянальных дакументаў, архіваў, успамінаў. Не шкадуючы сваіх сродкаў, вольнага часу многія едуць у Мінск, у Нацыянальную бібліятэку, архівы іншых гарадоў. У нашай моладзі пастаянна расце патрэба здабыць новыя веды, пераканаўчыя аргументы, гістарычныя факты, каб потым скрупулёзна перадаваць дзецям і ўнукам гістарычную праўду. Добра, калі ў сем’ях складаюцца генеалагічныя дрэвы, пішуцца сямейныя летапісы. Не сакрэт: чым глыбей мы будзем ведаць свае карані, гісторыю Бацькаўшчыны, тым мацней будзе айчынная самасвядомасць.
Сам Дзень народнага адзінства – яскравы прыклад захавання і памнажэння самой гістарычнай памяці. Менавіта ў адзінстве народа – яго мудрасць і сіла. Свята – гэта знак глыбокай павагі і ўдзячнасці да продкаў, якія здолелі ў складаны час аб’яднаць беларускі народ. Гэта напамін нам, нашчадкам, пра ратныя і працоўныя перамогі народа, якія базіруюцца на еднасці і згуртаванасці.
Сёння беларусы дэманструюць свету свае лепшыя рысы – высакароднасць, мудрасць, мужнасць, вернасць і бязмежную любоў да Айчыны. І абавязак сучаснікаў - памятаць пастаянна пра гэта, быць годнымі тых, хто падараваў нам магчымасць самастойна вызначаць сваё заўтра.
Гэтае свята – і пажаданне будучым пакаленням супрацьстаяць шматлікім міжнародным выклікам і пагрозам. Трэба быць пільнымі, трэба памятаць, што свабода і незалежнасць - бясцэнны дар.
З надыходзячым святам, беларусы і беларусачкі!
Хотите читать актуальные новости Ивья и Ивьевского района первыми? Подписывайтесь на наш Телеграм-канал по ссылке https://t.me/ivyenews
Канстанцін КАРНЯЛЮК.
