Дзеці старшай дашкольнай групы “Сонейка” вельмі актыўныя, дапытлівыя, творчыя. Яны любяць не толькі гуляць і займацца, а таксама разам са сваімі выхавальнікамі арганізоўваць пазнавальна - даследчую дзейнасць.
Падчас правядзення занятку па адукацыйнай вобласці “Дзіця і прырода” выхаванцы правялі шмат цікавых доследаў з паветрам. У выніку эксперыментавання рабяты даведаліся, што паветра не мае колеру, паху, смаку, што яно нябачнае і змяшчаецца ўнутры кожнага чалавека. Высветлілі, што паветра акружае нас вакол і неабходна ўсім жывым арганізмам на нашай планеце.
Выкарыстоўваючы шкляначкі з вадой і трубачкі, дзеці вызначылі, што паветра ёсць і ў арганізме чалавека. Выхаванцы наглядна ўбачылі, як адбываецца працэс дыхання: удыхаем мы праз нос, а выдыхаем праз рот, і чым больш паветра мы ўдыхаем, тым больш выдыхаем. Лёгкае паветра праз трубачку трапляе ў ваду, усплывае на паверхню ў выглядзе бурбалак і лопаецца. Хіба гэта не цуд?
Дзеці лавілі паветра, якое знаходзілася ў групе, у цэлафанавыя мяшэчкі, каб вызначыць, якога яно колеру, дзьмулі ў розныя музычныя інструменты, каб пачуць паветра, аблізвалі паветра язычком і лавілы ротам, каб паспрабаваць якое яно на смак, нюхалі, каб вызначыць, чым пахне паветра, усе разам надзімалі паветраныя шары, бо нават у іх назве ёсць паветра.
А як весела дзеці лавілі мыльныя бурбалкі, якія таксама з'яўляліся з дапамогай патоку паветра!
У працэсе эксперыментавання дзеці атрымалі магчымасць задаволіць уласцівую ім дапытлівасць, знайсці адказ на мноства цікавых пытанняў: Чаму? Навошта? Як? Яны выказвалі свае меркаванні, прадбачвалі вынікі.
Занятак атрымаўся цікавым, пазнавальным, падарыў дзецям шмат станоўчых эмоцый. А хтосьці нават заявіў, што калі вырасце, стане навукоўцам – даследчыкам.
Таццяна Здончык, выхавальнік дашкольнай адукацыі ДУА “Ліпнішкаўскі дзіцячы сад-сярэдняя школа”.
