НАСТАЎНІК БЕЛАРУСКАЙ МОВЫ І ЛІТАРАТУРЫ ЮРАЦІШКАЎСКАЙ СЯРЭДНЯЙ ШКОЛЫ Нона Сілюк.
«Асноўныя каштоўнасці любога чалавека фарміруюцца ў сям’і»
Наша гераіня прызнаецца, што яе змалку прывучалі да працы, да разумення таго, што добрая адукацыя адчыняе дзверы ў вялікі свет, а сям’я – гэта надзейны тыл і магчымасць пазбегнуць адзіноты.
- Я з’яўляюся прадстаўніком таго пакалення, для якога патрыятызм, адказнасць, сумленне, высакароднасць, самаахвярнасць – не пустыя словы. Таму ўсе гэтыя каштоўнасці я імкнуся перадаваць сваім вучням.
«Гульня “У школу”»
- Колькі сябе памятаю, заўсёды марыла быць настаўніцай. Любімая гульня ў дзяцінстве – “У школу”. Першай маёй «вучаніцай» была малодшая сястра. Спачатку марыла стаць настаўніцай геаграфіі: знаёміцца з далёкімі краінамі – гэта так рамантычна і цікава, але любоў да настаўніцы беларускай мовы Нілы Андрэеўны Будзько перамагла. Таму ў 16 гадоў я стала студэнткай філалагічнага факультэта БДУ, – з цеплынёй расказвае Нона Сілюк.
«Няма дзяцей – ёсць людзі»
Наша гераіня лічыць сябе дэмакратычным настаўнікам, які імкнецца ўлічваць індывідуальныя здольнасці сваіх вучняў і ствараць умовы для самаразвіцця і самавызначэнная.
- Пераканана, што без веры ў дзіцячыя магчымасці, без даверу ўсе нашы метады і прыёмы навучэння і выхавання нічога не значаць. Я люблю сваю работу, люблю дзяцей, іх непасрэднасць і нават капрызы. Для мяне як настаўніка важна разумець свайго вучня, паважаць яго меркаванні, падтрымліваць яго поспехі, захоўваць яго сакрэты, – адзначае настаўніца.
«Натхняе і прымушае вучыцца»
- Калі дзіцячыя вочы напоўнены радасцю і цікавасцю да майго прадмета, калі мы разам дасягаем пэўных вяршынь, то гэта натхняе і прымушае вучыцца, знаходзіць новае, здзіўляць і здіўляцца, – прызнаецца Нона Уладзіміраўна.
«Паспяховы настаўнік – гэта…»
Па меркаванні Ноны Сілюк, гэта настаўнік, які рухаецца наперад і адаптуецца да новага. Яна пераканана, што сучасны настаўнік павінен быць упэўненым і адкрытым для новых ідэй, знаходзіцца ў пастаянным пошуку цікавых падыходаў і незвычайных формаў, энергічным і мабільным.
Хотите читать актуальные новости Ивья и Ивьевского района первыми? Подписывайтесь на наш Телеграм-канал по ссылке https://t.me/ivyenews
Ксенія Салей.
