Абласны фестываль народнай творчасці ветэранскіх калектываў “Не старэюць душой ветэраны” адбыўся 19 сакавіка ў ДУК “Іўеўскі цэнтр культуры і вольнага часу”.
Горад-фестываль Іўе шчыра вітаў удзельнікаў абласнога фестывалю ў Год гістарычнай памяці.
Вядучыя фестывалю разам з намеснікам старшыні Іўеўскага райвыканкама Лідзіяй Вайцехаўнай Носуль падчас адкрыцця мерапрыемства жадалі “маладым па духу, аптымістычным, творчым і бадзёрым” моцнага здароўя, даўгалецця, бадзёрасці, натхнення і дзякавалі за гераічны ваенны і працоўны подзвіг.
У свяце прынялі ўдзел творчыя ветэранскія калектывы з Ліды, Бярозаўкі, Іўя, гарадскога пасёлка Мір, Ашмянаў і Смаргоні, з Дзятлава і Шчучына.
Адкрыла абласны фестываль народнай творчасці ветэранскіх калектываў “Не старэюць душой ветэраны” начальнік упраўлення культуры Гродзенскага аблвыканкама Алена Віктараўна Клімовіч:
-Добры дзень, паважаныя сябры. Ведаеце вось, сяджу ў зале і думаю: “Пачну з беларускага выказвання “трэцім разам лепшым часам”. Два разы адклаўся наш фестываль, такі вельмі добры, вельмі важны, вельмі патрэбны фестываль “Не старэюць душой ветэраны”.
Я хачу падзякаваць сёння, безумоўна, Іўеўскаму раённаму выканаўчаму камітэту, Гродзенскаму абласному метадычнаму цэнтру за тую падрыхтоўчую працу, якая ішла да сённяшняга дня. І гэтыя два дні журы чакае вельмі прыемная праца - паслухаць, паглядзець на вас, такіх прыгожых, такіх вельмі-вельмі добрых. І галоўная прыгажосць у тым, што вы нераўнадушныя, што вы прыходзіце ў нашы ўстановы, спяваеце, збіраецеся разам.
Таму я хачу пажадаць нашым удзельнікам, нашым ветэранскім калектывам здароўя і яшчэ раз здароўя - вельмі актуальнае пажаданне ў сённяшнем свеце. Вельмі станоўча ўплывае на імунітэт арганізма менавіта калі чалавек заняты, калі ў яго ёсць мэта, ёсць справа, якой ён любіць займацца, ёсць сябры, добры настрой. А песні заўсёды нам дапамагаюць і нават лечаць. Нам усім – доўгага разам з вамі творчага шляху, каб мы сустракаліся многа - многа раз.
І сёння, ехаўшы ў Іўе, успамінала, калі таксама сядзела у складзе журы і слухала вашы выступленні, і адзначала адметныя асаблівасці і Ашмянскага ветэранскага хору, і хору з Бярозаўкі, і Воранаўскага, і хору Іўеўскага раёна - гаспадароў фестывылю. Гэты ўтульны іўеўскі зал адметны. У ім заўсёды свой асаблівы настрой, напаўторная атмасфера.
Выступяць сёння 8 калектываў з цікавымі праграмамі. Я жадаю, каб атрымалася тое, што вы рыхтавалі, каб журы было уважлівым і аб’ектыўным.
У якасці журы, аргкамітэта і гасцей абласнога фестывалю народнай творчасці ветэранскіх калектываў “Не старэюць душой ветэраны” прысутнічалі намеснік начальніка ўпраўлення культуры Гродзенскага аблвыканкама (старшыня журы) Сняжана Віктараўна Куратчык; старшыня Іўеўскага раённага аб’яднання арганізацый прафсаюзаў Анатолій Паўлавіч Букліс; намеснік дырэктара дзяржаўнай установы культуры “Гродзенскі абласны метадычны цэнтр народнай творчасці” (намеснік старшыні журы) Таццяна Уладзіміраўна Грыгаран; галоўны спецыяліст упраўлення культуры Гродзенскага аблвыканкама Ірына Юр’еўна Жук-Куніцкая; старшыня Іўеўскай раённай арганізацыі “Беларускае грамадскае аб’яднанне ветэранаў” Іван Станіслававіч Жыдзель; загадчык сектара культуры Іўеўскага райвыканкама Святлана Вацлаваўна Кішкель; старшыня Іўеўскага раённага Фонда міру Аляксандр Аляксандравіч Раманюк; старшыня камісіі па рабоце з моладдзю Гродзенскай абласной арганізацыі Беларускага грамадскага аб’яднання ветэранаў Аляксандр Іванавіч Сягоднік.
Усе выступленні былі паспяховымі, і гледачы атрымалі прыемныя ўраджанні, бо “ ў сэрцы песні не стрымаць пра наш любімы край”.
Распачаў праграму абласного фестывалю народнай творчасці ветэранскіх калетываў “Не старэюць душой ветэраны” хор ветэранаў працы Дзяржаўнай установы культуры “Іўеўскі цэнтр культуры і вольнага часу”, які з’яўляецца стабільным калектывам з актыўнай канцэртнай дзейнасцю (мастацкі кіраўнік - Вольга Аўдзевіч, канцэртмайстар - Леанід Журко). Калектыў прадставіў на конкурс песні ў апрацоўцы Леаніда Журко: “Маці-Айчына”(музыка і словы І. Раманчука); “Гордасць і слава, мая Беларусь!” (музыка Э. Ханка, словы Г. Бураўкіна); беларускую народную “Ой, на горцы”; “Залатая восень” (музыка А. Шчаглова, словы І. Капінкіна); “Родная хата”( музыка Л. Захлеўнага, словы А. Роўды); “Майскі парад” (музыка В. Кручкова, словы С.Елісеевай). Саліст хору – Мікалай Бакуновіч.
Кожны ветэранскі хор адметны. Народны хор ветэранаў ДУК “Ашмянскі раённы цэнтр культуры - актыўны ўдзельнік раённых, абласных і рэспубліканскіх мерапрыемстваў. Мастацкі кіраўнік – Ірына Асмольская. Акампаніруе народны аркестр народных інструментаў “Карусель” настаўнікаў дзяржаўнай установы адукацыі “Ашмянская дзіцячая школа мастацтваў” пад кіраўніцтвам Жанны Мажэйка. У рэпертуары калектыву - песні беларускіх і савецкіх кампазітараў, звязаныя з гераічным мінулым савецкага народа, і творы мясцовых кампазітараў.
Народная вакальная група ветэранаў працы аддзела культуры і вольнага часу “Мірскі гарадскі Дом культуры” дзяржаўнай установы “Карэліцкі раённы Цэнтр культуры і народнай творчасці” у 1995 годзе атрымаў найменне “народны”. Мастацкі кіраўнік - Вольга Ведзянеева, кіраўнік аркестравай групы – Віталь Нячай. Сёння калектыў вядзе актыўную канцэртную дзейнасць і з’яўляецца ўдзельнікам святочных абласных, раённых і рэгіянальных мерапрыемстваў.
Народны хор ветэранаў працы “Ветэраны ў страі” дзяржаўнай установы культуры “Дзятлаўскі раённы цэнтр культуры і народнай творчасці” мае свае добрыя творчыя традыцыі. Удзельнікаў хору яднае любоў да песні. Яны з’яўляюцца жаданымі гасцямі як у школах, на прадпрыемствах, так і на сцэне санаторыя “Радон”. Мастацкі кіраўнік хору і кіраўнік аркестравай групы - Таццяна Шостка.
Народны хор ветэранаў ДУК ”Смаргонскі раённы цэнтр культуры” з’яўляецца адным з лепшых мастацкіх калектываў Смаргоншчыны, і сёння любоў да песні цесна аб’яднала ветэранаў прадпрыемстваў, арганізацый і ўстаноў горада, для якіх песня з’яўляецца надзейным спадарожнікам у жыцці. Адметна, што рэпертуар хору складаецца як з твораў вядомых беларускіх, рускіх, так і самадзейных аўтараў.
У 2021 годзе калектыў атрымаў Гран – пры II Міжнароднага фестывалю-конкурсу творчасці “Пирамиды ЗВЁЗД”. Кіраўнік калектыву –Аляксандр Лях, кіраўнік аркестравай групы – Валянцін Бортнік.
Хор ветэранаў працы і Узброеных Сіл ДУК “Шчучынскі раённы цэнтр культуры і народнай творчасці” прымае ўдзел у многіх мерапрыемствах клубнай установы, вядзе актыўную канцэртна-гастрольную дзейнасць. Яго удзельнікі - аптымістычныя і ўлюблёныя ў песню людзі, гатовыя падзяліцца сваім жыццёвым аптымізмам. Мастацкі кіраўнік і акмпаніятар калектыву - Генадзь Паноў.
Народны хор ветэранаў “Крыштальныя крыніцы” ДУ “Бярозаўскі гарадскі Дом культуры” Лідскага раёна быў створаны ў 1983 годзе да 100-гадовага юбілею шклозавода “Неман”. За час працы хор неаднаразова станавіўся дыпламантам і лаўрэатам шматлікіх фестываляў і конкурсаў. Калектыў часта выязджае з канцэртамі ў розныя населеныя пункты, аддаленыя вёскі раёна і за яго межы, дзе карыстаецца вялікім поспехам у гледачоў. У 2000 годзе калектыву прысвоена ганаровае найменне “народны аматарскі калектыў”. Мастацкі кіраўнік - Раіса Хайдарава, акампаніятары – Анатоль Краўцоў і Наталля Чапукойць.
Народны хор ветэранаў “Майскія зоры” ДУ “Палац культуры горада Ліды” на працягу 2021 года прыняў удзел у шэрагу мерапрыемстваў, прысвечаных Году народнага адзінства. Дзейнасць калектыву спрыяе развіццю нацыянальных традыцый, патрыятычнаму выхаванню падрастаючага пакалення. Хор і яго салісты - неаднаразовыя лаўрэаты Рэспубліканскага фестывалю “Не старэюць душой ветэраны” і Рэспубліканскага вакальнага конкурсу сярод ветэранаў “Песни Победы” у г. Мінску. Мастацкі кіраўнік – Ніна Іванова, акампаніятар – Віктар Хобараў.
Для гледачоў- асалода, для журы і артыстаў – плённая праца.
Іўеўскі хор ветэранаў меў высокую адзнаку журы: былі ўзнагароджаны кіраўнік хору ветэранаў працы ДУК “Іўеўскі цэнтр культуры і вольнага часу” Вольга Аўдзевіч і старэйшы ўдзельнік хору ветэранаў працы Іўеўскага цэнтра культуры і вольнага часу – Аміня Адамаўна Радкевіч, якая атрымала спецыяльны падарунак абласнога аддзялення Беларускага фонду міру.
Іўеўская старонка дзіўнай красы сустракала ветэранаў з розных куткоў Беларусі як лепшых сяброў. А яны спявалі сэрцам. І ў кожнай страфе палала нечае сэрца.
Ірына Халява. Фота С. Зянкевіча.
