Якая восень, такое ж і жыццё ўстаноў культуры выдалася сёлета - прыгожае, цёплае, з лісцем, якое, прынамсі, нешта не хоча жаўцець. А зялёны колер - прыкмета маладосці. Яно так і ёсць. Толькі маладым і плённым па сілах асіліць такі цудоўны, такі творчы, такі незвычайны праект, як Тыдзень культуры Іўеўшчыны, які доўжыўся з 11 па 18 верасня. Правільней, напэўна, будзе сказаць не "доўжыўся" (доўга - гэта ў нейкім плане, маркотна, сумна). Праект той не доўжыўся, а ляцеў і лунаў, бо крылы яму далі багатыя сваёй творчасцю і плённай апантанасцю людзі.
Сёння мы папрасілі начальніка аддзела ідэалагічнай работы, культуры і па справах моладзі райвыканкама Вольгу Чаславаўну Барко падвесці вынікі гэтага адметнага Тыдня, адказаць на асобныя пытанні.
- Па-першае, адкуль з'явілася ідэя правесці падобнае мерапрыемства? Хто быў яе ініцыятарам?
- Неяк у аблвыканкаме прагучала пажаданне, каб культура вобласці асобнымі мерапрыемствамі паказала ўсе свае творчыя магчымасці, усе таленты, усё багацце культурнага жыцця і культурнай спадчыны рэгіёнаў.
Нам вельмі спадабалася сама ідэя. І мы сталі думаць, як яе пераўтварыць у жыццё. Ні для кога не сакрэт, што нам ёсць што паказаць, ёсць чым ганарыцца, ёсць на каго разлічваць нават у самых смелых і дзёрзкіх праектах.
Генератарам ідэі, месцам, дзе акумуліраваліся ўсе прапановы, стаў, канешне ж, наш аддзел народнай творчасці, супрацоўнікі якога надзвычай адказна і творча аднесліся да стварэння праекта, які б не пакінуў нікога абыякавым, які б не толькі прапагандаваў творчыя калектывы і асобных выканаўцаў, майстроў і цэнтры рамёстваў, мастакоў, танцораў, спевакоў, але і зацікавіў бы гледача і наведвальніка гісторыяй культурнай спадчыны, яе здабыткамі і г.д.
І, упэўнена, нам гэта ўдалося. 11 верасня адбылося ўрачыстае адкрыццё Тыдня культуры Іўеўшчыны пад назвай "Іўе шматнацыянальнае", падчас якога быў зроблены сапраўдны экскурс у культуру раёна, якая багата перапляла ў сабе пласты культур іўяўчан рознай нацыянальнасці і розных веравызнанняў. Урачыстасць зноў успомніла імёны тых работнікаў і дзеячаў культуры, якія пранеслі славу раёна па ўсёй Беларусі і за яе межамі. На адкрыцці дзякавалі тым, хто сёння стварае і плённа працуе. Было шмат цёплых, добрых, запамінальных момантаў.
Сваё мастацтва іўяўчанам дарылі самыя творчыя, самыя цудоўныя калектывы горада і раёна. Выступалі з прывітальнымі словамі творцы ў галіне мастацтваў, літаратуры, паэзіі.
- Некалькі слоў пра тое, чым быў багаты Тыдзень культуры.
- 15 верасня, акрамя таго, у Дзень бібліятэк і ў рамках Тыдня ў раённай бібліятэцы прайшоў Дзень адкрытых дзвярэй "Гасцінна запрашаем".
Мерапрыемства распачала экскурсія па бібліятэцы і віртуальнае рэтравандраванне "Іўеўшчына - часцінка Беларусі".
У той жа дзень у раённай бібліятэцы стартавала сусветная акцыя "Буккросінг", што ў перакладзе азначае "кнігаабмен" ці "абмен кнігамі".
У гэты ж дзень адбылася і прэзентацыя зборніка "Я родом не из детства - из войны…История Ивьевского сиротского детского дома".
Потым усім гасцям бібліятэкі была прапанавана экскурсія па нашым горадзе. І было глыбока сімвалічным тое, што госці наведалі Іўеўскі яслі-сад - пачатковую школу. Менавіта тут некалі і знаходзіўся дзіцячы дом.
У той жа дзень ладзілі і Дзень чытача. Усе наведвальнікі бібліятэкі мелі магчымасць бясплатна карыстацца камп'ютарам, браць кнігі з камерцыйнага фонду і перыядычныя выданні з фонду чытальнай залы тэрмінам на 5 дзён.
Другі дзень Тыдня аддаў знак пашаны Еўрапейскім дням спадчыны, якія традыцыйна святкуе ўся Еўропа з надыходам восені. У рамках гэтай падзеі Іўеўскі цэнтр культуры і вольнага часу і Іўеўскі музей нацыянальных культур правялі краязнаўчы фотапраект "Праз далеч стагоддзяў" з удзелам дзяцей і падлеткаў ва ўзросце ад 10 да 18 гадоў.
- Выбачайце, што перабіваю, але гэты Тыдзень яшчэ, здаецца, быў знамянальным тым, што ў розных праектах прынялі ўдзел дзеці і моладзь, шмат юнакоў і дзяўчат?
- Так. Моладзь заўжды прымае актыўны ўдзел у рабоце ўстаноў культуры. А гэты год, як Год моладзі, спрыяе павышанай увазе менавіта да моладзі, правядзенню розных мерапрыемстваў і праектаў.
У праграме фотапраекта адбыліся майстар-клас фатографа, выстава-конкурс на лепшы фотаздымак "Праз далеч стагоддзяў", лепшымі фотаздымкамі якой прызнаны работы Джульеты Кішкель і Аляксея Нехвядовіча. Музей, прынамсі, меў у той дзень вялікую праграму. Працавалі выставы "Побыт беларускіх яўрэеў", "Рукапісы не гараць". Праведзена першая экскурсія з цыклу "Гістарычная падарожжа па вуліцах горада Іўе". Экскурсанты ўбачылі вулі-цы Віленскую і Касцельную, пачулі іх гісторыю.
Адбылося таксама ўрачыстае адкрыццё юбілейнай выставы нашага знакамітага мастака Івана Васюкевіча.
Трэці дзень Тыдня быў прысвечаны прыгажосці, якую ствараюць майстры народнай творчасці - Дзень рамёстваў і традыцыйнай культуры "Бацькаўшчына светлая мая".
У Іўеўскай дзіцячай школе мастацтваў прайшоў Дзень адчыненых дзвярэй "Храм музыкі". На працягу яго ўсе жадаючыя маглі наведаць музычную гасцёўню "Пра музыку і кампазітараў", дзейнічала выстава дзіцячых малюнкаў "Юныя мастакі", гучала чароўная класічная музыка ў выкананні інструментальнага ансамбля "Raffika". А завяршыўся Дзень адчыненых дзвярэй канцэртнай праграмай "Чароўная сіла мастацтва".
Адзін з дзён прысвячаўся тэатру. У яго праграме быў спектакль лялечнага калектыву з аграгарадка Геранёны, інфармацыйна-пазнавальная праграма "На тэатральных падмостках" (аддзел культурна - масавай і асветніцкай работы вёскі Бакшты). Майстар-клас "Тэатр - маё жыццё" для дзяцей і моладзі паказаў рэжысёр народнага аматарскага драматычнага калектыву аддзела культурна-масавай і асветніцкай работы аграгарадка Трабы.
Спектакль па пьесе В. Ткачова "Слуп" пастаўлены народным тэатрам Іўеўскага цэнтра культуры і вольнага часу пад кіраўніцтвам рэжысёра Мікалая Завадскага.
Прайшоў Дзень жывапісу "Жывыя фарбы". Дзейнічала (і працягвае дзейнічаць) выстава работ мастака Івана Васюкевіча. Мастак правёў майстар-клас "Эскізы", адказаў на пытанні наведвальнікаў, падарыў на памяць свае аўтографы.
Падчас правядзення Тыдня культуры, 15 верасня адбыўся рэгіянальны сход дэпутатаў дваццаць сёмага склікання з удзелам членаў Савета Рэспублікі і Нацыянальнага сходу Рэспублікі Беларусь. Форум завяршыўся канцэртнай праграмай аматарскай творчасці "Мы разам!"
На летняй пляцоўцы горада выступіў вакальны ансамбль "Ворожея" адзела культурна-массавай і асветніцкай работы аграгарадка Ліпнішкі.
У гарадскім парку працавала выстава майстроў народнай творчасці "Горад майстроў", у якой прынялі ўдзел аддзел і сектар рамёстваў і традыцыйнай культуры горада Іўе і аграгарадка Геранёны.
Знакаміты ансамбль "Чабарок" падрыхтаваў выдатную культурную праграму, з якой выступіў на першым восеньскім кірмашы.
- Можна бясконца пералічваць гэтыя дні, напоўненыя колерамі вясёлкавай творчасці. І менавіта на гэты перыяд прыйшліся і асобныя мерапрыемствы па-за межамі раёна, у якіх прынялі ўдзел нашы творчыя калектывы...
- Так. 12 верасня ў гарадскім пасёлку Воранава прайшоў пяты адкрыты абласны фестываль гульні "Карнавал весялосці". З тэатралізаванай гульнёвай праграмай "Залейковский сундук Добра" выступіў тэатр гульні і забаў "Зялёны фургон". Калектыў узнагароджан Дыпломам Галоўнага ўпраўлення ідэалагічнай работы, культуры і па справах моладзі Гродзенскага аблвыканкама.
- У Тыдні культуры прынялі ўдзел усе ўстановы культуры раёна. Завяршыўся творчы праект вялікім канцэртам "Іўеўскі карагод". Вашы меркаванні, Вольга Чаславаўна, наконт гэтых сямі, на маю думку, цудоўных дзён.
- Мая думка такая ж, як і большасці людзей. Яны выказваюць нам сваю падзяку. Нацыянальная культура з'яўляецца невычэрпнай крыніцай мудрасці, духоўнасці, багатых народных традыцый. І менавіта праз сферу дзейнасці рэгіянальнай культуры чалавек далучаецца да каштоўных здабыткаў яе і мастацтва, народных традыцый, больш глыбока і асэнсавана пранікаецца пачуццём любові да сваёй Радзімы. Гэта вызначае мэту праекта. Думаецца, што яна дасягнута.
- Дзякую за размову.
Гутарыла В. ГУЛІДАВА.
